उपत्यकामा साउन २० सम्म थपियो निषेधाज्ञा, के गर्न पाइन्छ, के पाइदैँन ?

१० साउन ०७८, काठमाडौँ । काठमाडौं उपत्यकामा साउन २० गतेसम्म निषेधाज्ञा थपिएको छ । आइतबार बसेको काठमाडौं, ललितपुर र भक्तपुरका प्रमुख जिल्ला अधिकारीको बैठकले २० साउनसम्म निषेधाज्ञा थप्ने निर्णय गरेको हो।
जिल्ला प्रशासन कार्यालय काठमाडौंले जारी गरेको निषेध आदेशअनुसार निषेधाज्ञाको अवधिमा सबै प्रकारका सभा, सम्मेलन, पार्टी गर्न पाइने छैन । यस्तै चलचित्र हल, डान्सबार, दोहोरी, नाचघर, क्लब, स्विमिङ पुल, सङ्ग्रहालय र दर्शकसहितका खेलकुदका गतिविधि गर्न पाइने छैन ।

यस्तै पुजारीबाट हुने नित्य पूजाबाहेक मन्दिरहरू बन्द रहने छन् । बिहान ९ बजेदेखि ११ बजेसम्म र बेलुकी ४ बजेदेखि ७ बजेसम्म ढुवानीका साधन चलाउन पाइने छैन ।

भौतिक उपस्थितिमा शैक्षिक संस्था सञ्चालन गर्न पाइने छैन तर एउटा कोठामा बढीमा २५ जना राखेर स्वास्थ्यका मापदण्ड पालना गरी परीक्षा सञ्चालन गर्न पाउने व्यवस्था गरिएको छ । साथै भौतिक रूपमा गर्नै पर्ने गोष्ठी, सेमिनार तथा तालिममा पनि २५ जनाभन्दा धेरै सहभागी गराउन पाइने छैन ।