दक्षिण ललितपुरस्थित भट्टेडाँडा क्षेत्रका खानी बन्द

१३ कात्तिक ०७८, चापागाँउ । दक्षिण ललितपुरको वागमती गाँउपालिकास्थित भट्टेडाँडा आसपासका खानी बन्द गर्न गाँउपालिकाले निर्देशन दिएको छ । शुक्रबार कार्यालय समयमा सूचना प्रकाशित गरेर गाँउपालिकाले पालिकाभित्रका वालुवा खानी,ढुंगा,गिटी र माटो ननिकाल्न अनुरोध गर्दै कात्तिक १३ गते शनिबार (आज)बाट खानीहरु बन्द गर्न निर्देशन दिएको हो ।
गाँउपालिकाले नयाँ ठेक्का लगाउने प्रकृया सुरु गर्नेका लागि खानी बन्द गर्ने निर्णय गरेको गाँउपालिकाका संचार संयोजक दिपक समिरले ललितपुर खबरलाई बताए । उनले भने, ‘ठेक्का लागेपछि पुन उत्खननको अनुमती दिइनेछ । खानी केही दिनमात्रै बन्द हुन्छ ’

यस अघि गाँउपालिकाले पटक पटक टेण्डर आह्वान गर्दा टेण्डर नपरेपछि गाँउपालिकाले अमानतमा कर उठाउदै आएको थियो । यो पल्ट गाँउपालिकाले टेण्डर लगाउने निर्णय गरिसकेको छ ।
दक्षिण ललितपुरको वागमती गाँउपालिकाको छपेली, भट्टेडाँडा, यास्पा,डाँडागाँउलगायत स्थानमा वालुवा रहेको छ ।
गाँउपालिकाको छपेलीमा सञ्चालित खानीबाट वालुवा उत्खनन भइरहेको छ ।
गाँउपालिकाको भालुखोला र वगुवा क्षेत्रमा झण्डै दर्जनको संख्यामा वालुवा प्रशोधन केन्द्र सञ्चालित छन् । यी प्रशोधन केन्द्रले भालुखोला र खानीखोलामा वालुवा चालेर पानी खोलामा छोड्दा पानीको श्रोत फोहोर भएको भन्दै स्थानीयबासीले विरोध गर्दै आएका छन् । साथै गाँउपालिकामा अबैध रुपमा वालुवा उत्खनन गर्ने क्रम बढेको भन्दै स्थानीयबासी गुनासो गर्दै आइरहेका छन् ।