ललितपुर पाटनको आगलागी घटनाका मृतक विप्लवको स्मृतिमा २० लाखको अक्षयकोष स्थापना

ललितपुर
३ फागुन । आगलागीमा परेका छिमेकीलाई बचाउन जाँदा ज्यान गुमाएका विप्लभ अधिकारीको स्मृतिमा उनका पिताले अक्षयकोष स्थापना गरेका छन् ।
सो रकमबाट विप्लभका पिता ठाकुरप्रसादले विपत्तिमा राहात तथा उद्धार कार्यका लागि छोराको नामबाट रु २० लाखको राहत तथा उद्धारकोष स्थापना गरेका हुन् ।
गत वर्ष माघ २३ गते आगलागीमा परेका छिमेकी ७० बर्षिय खड्गबहादुर लिम्बूकी श्रीमती सुष्मालाई बचाउन जाँदा ग्यास सिलिण्डर पड्किएर दन्किएको आगोमा परी विप्लवले ज्यान गुमाएका थिए ।
सोमबार आयोजित विप्लभको श्रद्धाञ्जली सभामा बागमती प्रदेशका कृषि तथा पशुपक्षी विकासमन्त्री केशवप्रसाद पोखरेलले विप्लवले साहसका साथ काम गरेर युवालाई सामाजिक दायित्वतर्फ मार्गनिर्देश गरेको बताए ।
ल्लितपुर ३ की सांसद डा तोसिमा कार्कीले विप्लभ आफू मरेर पनि अरुलाई उद्धार गरेर सदैव धन्यवादको पात्र भएको बताइन् । ललितपुर महानगरपालिकाका प्रमुख चिरीबाबु महर्जनले अक्षयकोषका लागि महानगरले रकम उपलब्ध गराउनेछ बताए ।

कोषमा आगलागीबाट उद्धार गरिएका छिमेकी खड्गबहादुरले पाँच लाख, मन्त्री पोखरेलले ५० हजार र सांसद कार्कीले एक महिनाको तलब उपलब्ध गराउने प्रतिबद्धता जनाइन् ।