संसदमा एमालेको नाराबाजी र वेल घेराउ, बैठक शुक्रबारसम्मलाई स्थगित

२४ साउन । प्रतिनिधि सभाको बैठकमा प्रमुख प्रतिपक्षी नेकपा एमालेले बुधबार पनि अवरोध गरेको छ । सुन तस्करी प्रकरणमा उच्चस्तरीय छानबिन समिति गठनको माग गर्दै आएको एमालेले बुधबारको प्रतिनिधि सभा बैठक पनि अवरोध गरेको हो ।

बैठकको शुरुमै एमाले सांसदहरु आफ्नो स्थाबाट उभिए र नाराबाजी गरेपछि सभामुख देवराज घिमिरेले एमाले सांसद सूर्यबहादुर थापालाई बोल्न समय दिएका थिए । थापाले तथ्यलाई ढाकछोप गरेर तस्करीलाई संरक्षण गर्ने गरी गृहमन्त्रीको जवाफ आएको आरोप लगाए ।

सांसद थापाले बोलिसकेपछि एमाले सांसदहरुले वेल घेराउ गर्दै नाराबाजी गरे । एमाले सांसदहरुले निरन्तर नाराबाजी गरेपछि सभामुख घिमिरेले प्रतिनिधि सभाको बैठक साउन २६ गते शुक्रबार दिउँसो १ बजे सम्मका लागि स्थगित गरिएको घोषणा गरे ।