२२ पुस ०७७, ललितपुर । ललितपुरस्थित पाटन संयुक्त क्याम्पसमा अध्ययनका लागि भिसा लिएका एक दम्पत्तीलाई सरकारले निष्काशन गरेको छ । गृह मन्त्रालयले प्रवेशाज्ञा (भिसा) दुरुपयोग गरी इसाई धर्म प्रचारमा संलग्न बेल्जियमका दम्पतीलाई निष्काशन गरेको हो । मन्त्रालयको पुस १६ को ‘सचिवस्तरीय’ निर्णयले वाल्टर स्भेन र लुसिन इभेलियनलाई पाँच वर्ष नेपाल प्रवेशमा प्रतिबन्ध लगाउँदै निष्काशन गरेको हो ।
अध्यागमन विभागका अनुसार उनीहरु पुस २६ मा फर्किन लागेको जानकारी दिए । दम्पतीले हवाई टिकटलगायत आवश्यक कागजपत्र विभागमा पेस गरेका छन् ।
धर्म प्रचार गरेको पुष्टि भएपछि निष्काशन गर्न प्रक्रिया अघि बढाउन लाग्दा उनीहरूले अध्यागमनका कर्मचारीलाई अदालत जाने धम्की दिएका थिए ।
मन्त्रालयले यसअघि फिलिपिन्स, जापान, अस्ट्रेलियालगायतका ७ विदेशीलाई धर्म प्रचारमा संलग्न भएको पुष्टि भएपछि निष्काशन गरेको थियो ।
पाटन क्याम्पसमा अध्ययन गर्न भिसा लिएका पछिल्ला दुई विदेशी २०७५ सालदेखि पाँचथर फिदिममा बस्दै आएका थिए । जिल्ला प्रशासन कार्यालय पाँचथरले उनीहरूको शंकास्पद गतिविधिबारे मन्त्रालयको शान्ति सुरक्षा महाशाखामा पत्राचार गरेको थियो ।
पाटन क्याम्पसमा स्नातक तहमा भर्ना भए पनि तीन वर्षदेखी पाँचथरमा बस्दै आएका थिए । वाल्टर स्भेन पास्टर हुन् । वाल्टरले पाँचथरमा विभिन्न खेलकुदका कार्यक्रम आयोजना गर्ने र त्यस्ता कार्यक्रमबाट पनि प्रत्यक्ष समुदायमा गएर इसाइ धर्म परिवर्तन गराउँदै आएका थिए ।
खेलुकुदका कार्यक्रम गराउने र वाध्यवादन सिकाउने वहानामा बेल्जियन दम्पतीले सहजै आर्थिक अवस्था कमजोर भएको समुदायमा पुगि विभिन्न प्रलोभनमा पारी इसाइ धर्म परिवर्तन गराउन बाध्य पार्दै आएका थिए ।
भिसा दुरुपयोग गरि विदेशी नागरिक धर्म प्रचारलगायत शंकास्पद गतिविधिमा संलग्न हुन थालेपछि विभागले प्रभावकारी अनुगमन गर्ने तयारी गरेको छ ।
प्रतिक्रिया