२७ पुस ०७७, भक्तपुर । भक्तपुरको सूर्यबिनायक नगरपालिका ६ पाण्डुबजारमा आगलागी हुँदा १२ लाख बढीको क्षति भएको छ । स्थानीय ५५ वर्षीय रामकृष्ण चौगुठीको एकतले कच्ची जस्ताको टहरामा बस्ने भोजबहादुर धिसिङले संचालन गरेको मासु पसलबाट आगोलागी शुरु भएको थियो । नजिकैको पाँंच वटा पसलहरु पनि जलेर नष्ट भएका छन् । स्थानीय, दमकल र प्रहरी टोलीको संयुक्त सहयोगमा आगो पूर्ण रुपमा नियन्त्रणमा आएको छ ।
बिजुलीको तार सर्ट भई आगोलागी भएको जनाइएको छ ।आगोलागी भई नजिकैको अन्य पसलहरुमा समेत सल्किन जाँदा अदाजी १२ लाख साठी हजार बराबरको धनमाल जलि नष्ट भएको अनुमान गरिएको छ ।
आगालागीबाट भक्तपुर सुर्यबिनायक नगरपालिका ६ पाण्डुबजार बस्ने रामकृष्ण चौगुठीको फर्निचर पसलमा रहेको दराज, टेबुल, फर्निचर बनाउने काठ र बा ७५ प ५८२४ नं को यामाहाको मोटरसाइकल समेत जलि अन्दाजी ६ लाख बराबरको क्षति भएको जनाइएको छ । यस्तै सोही स्थान बस्ने भोजबहादुर धिसिङको मासु पसलमा रहेको जिउँदो बोईलर कुखुरा २५ वटा, तयारी मासु र फ्रीज १ थान समेत पुर्ण रुपमा जलि अन्दाजी दुई लाख बराबरको क्षति भएको जनाइएको छ ।
साथसाथै सोही स्थान बस्ने नारायण साडेमियाले संचालन गरेको चिया पसलमा रहेको फ्रीज १ थान, टेबुल, कुर्सी, र अन्य सामानहरु समेत जलि अन्दाजी दुई लाख र बिमल घिमिरेले संचालन गरेको फेन्सी कपडा पसलमा रहेको कपडाहरु जलि अन्दाजी साठी हजार बराबरको क्षति भएको जनाइएको छ । साथै आगलागीबाट सोही स्थान बस्ने नरेश कर्माचार्यको कोठा समेतमा आगोलागी हुँदा कोठामा रहेका दराज, पलंग, कार्पेट, बेड बिस्तारा, लत्ता कपडा र अन्य सामान समेत जलि अन्दाजी दुई लाख बराबरको क्षति भएको महानगरीय प्रहरी परिसर भक्तपुरले जनाएको छ ।
प्रतिक्रिया