ललितपुर शंखुमा आगलागीबाट १५ लाख ८१ हजारको क्षति

२८ पुस ०७७,शंखु ललितपुर । कोन्ज्योसोम गाउँपालिका २ शंखु भलडाडाँ बस्ने राम प्रसाद घिमिरेको १ तले घर र गाइगोठमा सोमबार राति भएको आगलागी का कारण १५ लाख ८१ हजार बराबरको क्षति भएको छ ।
प्रहरीका अनुसार घिमिरेको घर पूर्ण रुपमा जलेर नष्ट भएको छ । उनको घरभित्र रहेको अन्नपात, लत्ताकपडा, भाँडावर्तन, फर्निचर, सुन र चाँदीका बिभिन्न गरगहना र गोठ जलेर करिब १५ लाख ८१ हजार रूपैयाँ मूल्य बराबरको धनमाल नष्ट भएको हो ।
स्थानीयबासीको सहयोगमा आगो नियन्त्रणमा लिनुका साथै यस सम्बन्धमा प्रहरीले आवश्यक अनुसन्धान गरिरहेका बताएकोे छ ।
मंगलबार मध्यरातमा घिमिरेले घरमा आगलागी भएको १५ बजेर १५ मिनेटमा थाहा पाएको र गुहार मागेका थिए ।
घिमिरेको घर नजिकै अन्य घरहरु पनि रहेकाले सहयोग मिलेको थियो ।
आगलागी भएपछि छिमेकीले भैसी फुकाएर बाहिर पठाएका कारण पशुको क्षती हुन पाएन । भने परिवारका अन्य सदस्यहरु समेत आगलागीपछि बाहिर निस्केका थिए ।
शंखुका एक स्थानीयका अनुसार घिमिरेको घरमा रहेका भाँडाकुडा सबै जलेर नष्ट भएको थियो । आगलागीपछि सुनका केही गहना भने भेटिएको खबर छ ।
आगलागी नियन्त्रणको केही घण्टापछि ललितपुरको चौघरेस्थित प्रहरी चौकबिाट घटनास्थलमा प्रहरी पुगेको थियो । तुलनात्मक रुपमा भट्टेडाँडा प्रहरी चौकी नजिक भए पनि खबर नपाएको स्थानीय प्रहरीले ललितपुर ख्बरलाई बताएको थियो ।
सदरमुकामबाट झण्डै ४५ किलोमिटर टाढा रहेको विकट पहाडी भेग शंखुको भलडाँडामा पुल्चोकबाट दमकल पुग्न सम्भव नभएको एक स्थानीयले बताए । उनले भने, पहाडको कान्लामा दमकल जान कठीन थियो । साथै आगलागी भएका घरसम्म मोटर बाटो समेत थिएन ।