ललितपुरको महालक्ष्मी नगरद्वारा टिकाथलीमा कोरोना युनिट संचालन

३० वैशाख ०७८,इमाडोल ललितपुर । महालक्ष्मी नगरपालिकाले १० शैया क्षमताको कोरोना हाइ केयर युनिट सञ्चालन गरेको छ । महालक्ष्मी नगरपालिकाद्वारा टिकाथलीस्थित केयर एण्ड क्यूर मल्टिस्पेस्लिष्ट हस्पिटलसँगको सहकार्यमा बुधबाबाट “कोरोना हाइ केयर युनिट” गतवैशाख २३ गते भएको सम्झौताअनुसार यो युनिट सञ्चालनमा ल्याएको जानकारी दिएको छ ।
टिकाथली वडा नं. ५ का वडाध्यक्ष राजकुमार सिलवाल का अनुसार अहिले यस युनिटमा ४ जना कोरोना संक्रमितको उपचार भइरहेको छ । वडाध्यक्ष सिलवालले भने, ‘हामी २० जनासम्म यस युनिटमा विरामी राखेर उपचार गराउने तयारीमा छौं ।’
वडाध्यक्ष सिलवालले नेपाल सरकारबाट प्राप्ट हुने प्रति शैयाको ३ हजार पाँच सय रुपैयाँ नगरपालिकाले ग्यारेण्टी बस्ने र बाँकी अन्य खर्च नगरपालिकाले व्यर्होनेछ ।
महालक्ष्मी नगरपालिकाको वडा नं ५ स्थित केयर एण्ड क्यूर मल्टिस्पेस्लिष्ट हस्पिटलमा सोही नगरपालिकाका गम्भीर प्रकृतिका कोरोना संक्रमितहरूको उपचारार्थ गराउँदै आएको छ ।
यस नगरपालिका र केयर एण्ड क्युर हस्पिटलबीच कोभिड हाई केयर युनिट सञ्चालनका लागि वैशाख २३ गते सम्झौता भएको थियो । सम्झौता पत्रमा नगरपालिकाको तर्फबाट नगरप्रमुख रामेश्वर श्रेष्ठ र केयर एण्ड क्युर अस्पतालको तर्फबाट डा.प्रेम देवानले हस्ताक्षर गरेका छन् । सम्झौता अनुसार केयर एण्ड क्यूर मल्टीस्पेशलिष्ट हस्पिटलबाट महालक्ष्मी नगरपालिका भित्रका कोरोनाका विरामीहरूलाई अक्सिजन थेरापीसहितको केयर सर्भिस उपलब्ध गराउनेछ र सेवा प्रदान गरे वापत अस्पतालले नेपाल सरकारको निर्णय बमोजिमको शुल्क अस्पतालले शोधभर्ना पाउने छ ।
हाललाई कोराना हाई केयर आइसोलेसन युनिटमा १० बेड सञ्चालनमा ल्याइएको छ र यसलाई क्रमश बढाइदै लगिने पालिकाले जनाएको छ । नगर प्रमुख श्रेष्ठले विरामीको चाप अनुसार उक्त युनिटमा ३० बेडसम्म सञ्चालनमा ल्याइने बताएका छन् । अक्सिजन सपोर्ट आवश्यक पर्ने नगरभित्रका गम्भीर प्रकृतिका कोरोना संक्रमितहरूलाई यो सेवाबाट राहत मिल्ने विश्वास उनले व्यक्त गरेका छन् । कोरोना हाईकेयर आइसोलेसन युनिट सञ्चालनमा आवश्यक सहयोग, समन्वय एवम् सुपरभिजनका लागि नगरपालिकाबाट मेडिकल अधिकृत डा.दिपेश उप्रेतिको संयोजकत्वमा स्वास्थ्य प्राविधिक टोलि खटाइएको नगरपालिका जनाएको छ ।