दक्षिण ललितपुरको वागमतीमा ६५ वटा भैसी अनुदानमा वितरण

१३ असार ०७८, ललितपुर । दक्षिण ललितपुरको वागमती गाँउपालिकामा भैसी प्रबर्धन कार्यक्रमअन्तर्गत उन्नत जातका भैँसी वितरण गर्ने भएको छ ।
बागमती गाउँपालिका र किसान बिचको लागत साझेदारीमा बागमती गाऊपालिका लाई भैँसी पकेट कार्यक्रम अन्तर्गत वडा न १,३ र ५(घुसेल, भट्टेडाँडा र प्युटार)का किसानलाई ६५ वटा उन्नत भैँसी हस्तान्तरण गर्ने कार्यक्रम रहेको बागमती गाऊपालिका पशु शाखा प्रमुख ईश्वर घिमिरेले जानकारी दिए ।
दूधमा आत्मनिर्भर बनाउन र कृषिमा किसानहरूको आकर्षण बढाउन उन्नत जातका भैँसी हस्तान्तरण गर्न लागेको बागमती गाऊपालिका प्रमुख वीरबहादुर लोप्चनले बताए ।
पालिका अध्यक्षले भने’‘पशु शाखामा सूचिकृत भएका तथा विगतदेखि पशुपालनमा लागेका व्यावसायिक समूहलाई भैँसी प्रदान गर्न लागिएको हो । यस कार्यक्रम अन्र्तगत किसानलाई करिब ३९ लाख ५० हजार बराबरका भैँसी वितरण गर्ने कार्यक्रम छ ।’
गोठ सुधार, भकारो सुधार तथा पशु विमा अनिवार्य गरेकाले यो अनुदानका लागि माग गर्न सक्नेछन् । पहिले अनुदान लिई सकेकालाई पुन अनुदान फारम भर्न नपाउने गाँउपालिकाले जानकारी दिएको छ ।
व्यावसायिक पशुपालनमा किसानलाई आकर्षित गर्न र किसानको आय स्तर वृद्धि गर्न अनुदानमा उन्नत जातको भैँसी वितरण गरिएको पशु सेवा शाखा प्रमुख इश्वर प्रसाद घिमिरेले बताए । किसानलाई व्यावसायिक बनाउन र किसानको आय स्तरमा वृद्धि गर्ने उद्देश्य सहित उन्नत जातका भैँसी वितरण गरिएको उनको भनाई छ ।
किसानलाई पशुपालनमा आकर्षित गर्न गाउँपालिकाले कृषकको उत्पादन गाउँपालिकाको अनुदान कार्यक्रम सञ्चालन गरी रहेको उनको भनाई छ ।
गाउपालिकाले यस अघि विभिन्न कार्यक्रमहरुमार्फत भकारो सुधार, उन्नत जातको घाँस, पसु बिमा तथा अनुदान समेत वितरण गरिसकेको गाँउपालिका अध्यक्ष लोप्चनको भनाई छ ।
बजारमा दूधको माग बढ्दै गएकाले परम्परागत पशुपालनलाई व्यावसायिक बनाउन उन्नत जातका भैँसी पालन थालेको बागमती गाउपालिका ३ का किसान दिपक तिमल्सिनाले बताए । पछिल्लो समय गाँउमा व्यावसायिक भैसीपालन भइरहेको छ ।