ओलीको जस्तै बहिर्गमनमा नपर्न अरु राजनीतिक दल गम्भीर बन्नुपर्छः सिंह

२७ साउन ०७८, भक्तपुर । नेपाली कांग्रेसका नेता प्रकाशमान सिंहले जनमत र विधिको शासनको उपहास गर्दा बालुवाटारबाट ओली बालकोट पुगेको कुराबाट सबैले पाठ सिक्नुपर्ने बताएका छन् । जनताले दिएको म्यान्डेटको अपमान गरेर ‘मनै विधि मनै कानुन हुँ मैले जे गरेपनि हुन्छु भन्ने सोचले ओलीको बहिर्गमन भएको भन्दै संविधान र कानुनभन्दा माथि कोही पनि नहुने उनले बताए । ओलीमा बढेको अहमताले मुलुकको राष्ट्रिय राजनीति फरक किसिमले अघि बढेकोको भन्दै ओलीमा भनाई र गराई फरक रहेको बताए । आफ्नो शासनकालमा के कति भ्रष्टाचारका समाचार आए भन्ने कुरा ख्याल गर्नसमेत उनले ओलीलाई चेतावनी दिए ।

‘मनै सबथोक हुँ मैले बोलेपछि, मैले भनेसी किन नहुने भनेकै कारण झन्डै दुईतिहाईको सरकार बालुवाटारबाट बालकोट पुगेको कुराबाट सबैले पाठ सिक्नुपर्छ’ आज भक्तपुरको मध्यपुर नगरपालिका वडा नं ३ को को नवनिर्मित वडा कार्यालय भवनको उदघाटन गर्दै सिंहले भने, ‘त्यसैले समयको माग र जनचाहाना अनुरुप विधि प्रक्रियाबाट नचल्दाको परिणामका कारण ओली बहिर्गमनमा परेका हुन् ।’ ओलीको जस्तै बहिर्गमनमा नपर्न अरु राजनीतिक दल पनि गम्भीर बन्नुपर्ने उनले बताए । नेता सिंहले जनप्रतिनिधि जनता र मुलुकप्रति उत्तरदायी हुनुपर्ने भन्दै जन प्रतिनिधिले गर्ने व्यवहारलाई नागरिकले उच्च महत्त्वका साथ हेरिरहेको उनको भनाई थियो । त्यसैले जन प्रतिनिधिका गतिविधि नागरिकप्रति उत्तरदायी हुनुपर्ने उनको भनाई छ ।