मेयर श्रेष्ठद्धारा लामाटारमा वडा कार्यालय शिलान्याश

२७ साउन ०७८, ललितपुर । महालक्ष्मी नगरका मेयर रामेश्वर श्रेष्ठले लामाटारमा निर्माण हुने महालक्ष्मी नगरपालिकाको वडा नं ९ को वडा कार्यालय भवनको शिलान्याश गरेका छन् ।
भवनको शिलान्यसपछि सम्बोधन गर्दै नगर प्रमुखज्यूले यो भवनको निर्माण तोकिएको समयभित्रै तोकिएको मापदण्ड र गुणस्तरमा निर्माण सम्पन्न गरी भवन हस्तान्तरण गर्न सम्बन्धित निर्माण व्यवसायीलाई निर्देशन दिएका छन् ।
शिलान्यस कार्यक्रममा प्रमुख प्रशासकीय अधिकृत श्री पुरुषोत्तम सापकोटा, वडाअध्यक्षज्यूहरू, पूर्वअध्यक्ष चिरञ्जीवी आचार्य, नेपाली काङ्ग्रेस ललितपुर क्षेत्र नं २ का सभापति श्री महेश खड्का, महालक्ष्मी नगरपालिकाका इन्जिनियरहरू,कर्मचारीहरूको उपस्थिति रहेको थियो ।
नगरप्रमुख श्रेष्ठले निर्वाचन घोषणा पत्रमा गरिएका अधिकांश प्रतिबद्धताहरू पुरा भएका र केही छिट्टै पुरा हुने क्रममा रहेका बताए । उनले नगरपालिकाले भौतिक पूर्वाधार, शिक्षा, स्वास्थ्य, खानेपानी, उद्यम विकास तथा रोजगारी, कानुन निर्माणजस्ता क्षेत्रहरूमा हालसम्म प्राप्त भएका मुख्य मुख्य उपलब्धी बारे जानकारी गराएका थिए ।
कार्यक्रममा वडा नं ९ का वडा अध्यक्ष श्री वासुदेव शर्मा गौतम, साविक लामाटार गा.वि.स.का पूर्व अध्यक्ष श्री चिरञ्जीवी आचार्य, नेपाली काङ्ग्रेस ललितपुर क्षेत्र नं २ का सभापति श्री महेश खड्काले नगरको विकाशका सन्दर्भमा बोलेका थिए भने नगरपालिकाका इन्जिनियर मनिष सुवेदीले निर्माण हुने भवनको प्राविधिक विवरणबारे जानकारी दिएका थिए ।
कार्यक्रममा भवन निर्माणको ठेक्का प्राप्त गर्ने बस्नेत निर्माण सेवाका प्रोप्राइटर धन बस्नेतले समयमा नै गुणस्तरीय भवन निर्माण गर्ने प्रतिबद्धता व्यक्त गरेका थिए ।