दक्षिण ललितपुरमा बाढी : एक महिलाको मृत्य, बालिका बेपत्ता

१२ भदौं ०७८, ललितपुर । दक्षिण ललितपुरको वाग्मती गाउँपालिका ६ आश्राङ र नं ७ गिम्दीको सङ्गमस्थल शुभाने खोलाले बगाएर एक महिलाको ज्यान गएको छ भने एक बालिका बेपत्ता भएकी छिन् ।
विगत तीन दिनदेखि आएको अविरल वर्षासँगै शुक्रबार बाढीले बगाउँदा स्थानीय ४० वर्षीया महिलाको ज्यान गएको हो । वडा नं ७ का वडाध्यक्ष नवराज सञ्जेलले दिउँसो ४ः३० बजेतिर खोला तर्ने क्रममा आएको बाढीले बगाउँदा अन्दाजी आठ वर्षीया बालिका बेपत्ता भएको जानकारी दिए । स्थानीयवासी उद्धव घिमिरेका अनुसार ज्यान गुमाउनेको नाम स्थानीय सञ्जु सिङतान हो । बेपत्ता भएकी बालिकाको परिचय खुल्न सकेको छैन ।
महानगरीय प्रहरी वृत चापागाउँका प्रहरी निरीक्षक (इन्सपेक्टर) राजेन्द्र क्षेत्रीले घटनाको सुचना पाउनासाथ प्रहरी टोली घटनास्थलतर्फ लागेको जानकारी दिए । विगत केही दिनदेखि मुलुकका विभिन्न स्थानमा बाढी अनि पहिरोलगायत डुव्बानको समाचार आइरहँदा कान्ति लोकपथ तथा बगुवा र आश्राङ सडकसमेत अवरुद्ध भइरहेको छ ।