ललितपुर खबर- २० भदौं ०७८, ललितपुर । ललितपुर नख्खु कारागारमा रहेका कैदीबन्दीहरुले आइतबार प्रदर्शनका साथै नाराबाजी गरेका छन् ।
उनीहरुले ८ जना चौकीदारलाई हटाउनुपर्ने माग गर्दै नाराबाजी र प्रदर्शन गरेका हुन् । करिब पाँच दर्जन कैदीबन्दीहरुले कारगारको सीआरसी ब्लकमा चौकीदारहरुविरुद्ध आइतबार प्रदर्शन गरेपछि कारागारभित्र सुरक्षा सतर्कता बढाइएको छ ।
चौकीदारले रासनमा घोटाला गरेको, टेलिफोन सुविधा सहज नबनाएको, सरकारले दिने अन्य सुविधामा पनि आफ्नो मनोमानी गरेको भन्दै कैदीहरुले चौकीदारहरु विरुद्ध जेलर चिरञ्जीवी गिरीसमक्ष निवेदन समेत दिएका छन् ।
प्रदर्शनमा सहभागीहरुले कारागारका नाइके शिव चौधरी, रिकेश अधिकारी, सविन केसी, शम्भू कार्की, अरुणकुमार महतो, विशाल विष्ट तथा सहनाइके देवेन्द्र तिमल्सिना र दीपक कर्णलाई कारागार स्थानान्तरणको मागसमेत राखेका छन् । विशाल विष्ट नख्खु कारागार मुख्य नाइके हुन् ।
यस्तै उनीहरुले जेलभित्रैबाट ताला लगाएका छन् । नख्खु कारागारमा करिब १४०० जना कैदीबन्दी रहेका छन् ।
प्रतिक्रिया