बिजुक्छेद्वारा भक्तपुरको रानीपोखरी जीर्णोद्धारको स्थलगत निरीक्षण

४ बैशाख ०७८, भक्तपुर । नेपाल मजदुर किसान पार्टी (नेमकिपा)का अध्यक्ष नारायणमान बिजुक्छे (रोहित)ले भक्तपुरको ऐतिहासिक रानीपोखरी जीर्णोद्धारको स्थलगत निरीक्षण गरेका छन् । अध्यक्ष बिजुक्छेले आज सैनिक महाविद्यालय परिसरभित्र रहेको ऐतिहासिक रानीपोखरीसँगै प्रसिद्ध सिद्धपोखरी र निर्माणाधीन भाजुपोखरीको समेत स्थलगत निरीक्षण गरेका हुन् ।
निरीक्षणका क्रममा अध्यक्ष बिजुक्छेले भक्तपुर नगरपालिकाले संरक्षणको अभावमा जीर्ण अवस्थामा रहेको भक्तपुरको रानीपोखरीलाई पुनर्जीवन दिई सराहनीय कार्य गरेको बताएका थिए । प्राचीन शहरमा पोखरीको महत्व धेरै भएको बताउँदै उनले सभ्यताको विकास र महत्वबारे बुझ्न प्राचीन सम्पदाको विशेष स्थान रहने र त्यसको संरक्षणमा सम्बन्धित निकायले ध्यान दिनुपर्नेमा जोड दिए ।
उनले सम्पदा पुनःनिर्माण र संरक्षणमा आफ्नै सीप, श्रम र आर्थिक लगानी लगाउन सकेमात्र दिगो हुने बताए । “विदेशी सहयोग र अरुका भरमा गर्ने विकास निर्माणका कार्य दिगो हुँदैन । आफ्नै पहल र अगुवाइमा स्वावलम्बी भई सम्पदा पुनःनिर्माण तथा जीर्णोद्धार गर्नुपर्छ, जुन भक्तपुर नगरपालिकाले देशकै लागि उदाहरणीय कार्य गरेकोे छ ।”
विसं १६८७ मा तत्कालीन राजा जगज्योति मल्लको पालामा निर्माण भएको रानीपोखरी र त्यसको डिलमा रहेको सत्तल पाटी एवं देवालीस्थल भक्तपुरकै सांस्कृतिक एवं ऐतिहासिक महत्वका सम्पदा मध्येमा पर्छन् । उक्त पोखरी जीर्णोद्धारमा हालसम्म रु दुई करोड ७५ लाख बराबरको रकम खर्च भइसकेको रानीपोखरी उपभोक्ता समितिले जनाएको छ ।

भक्तपुर नपाले नेपाली सेनासँग समन्वय गरी उक्त पोखरीको पटकपटक सरसफाइ गर्दै आएको र यस पोखरीमा प्राप्त प्रमाणका आधारमा मौलिकस्वरूपमै पोखरीको जीर्णोद्धार र निर्माण सम्पन्न गर्ने नगरपालिकाले जनाएको छ । हाल यस पोखरी परिसरको दक्षिणतर्फ ह्वाङह्वाङ पाटी, पूर्व र उत्तरतर्फका प्रवेशद्वार र पाटी निर्माण भइरहेका छन् ।
भक्तपुर नगरपालिकाका प्रमुख सुनिल प्रजापतिले भक्तपुरको रानीपोखरी जीर्णोद्धारको काम अन्तिम चरणमा पुगेको र पोखरी परिसरमा सौन्दर्य अभिवृद्धिको काम भइरहेको बताए । तीन वटा उपभोक्ता समितिमार्फत रानीपोखरी पुनःनिर्माणको कार्य अगाडि बढिरहेको जानकारी दिँदै उनले पुनःनिर्माणको सम्पूर्ण कार्य छिटै सम्पन्न हुने र सर्वसाधारण जनताका निम्ति पोखरी खुला हुने बताए ।
निरीक्षणमा भक्तपुर नगरका उपप्रमुख रजनी जोशी, प्रहरी उपरीक्षक शिवकुमार श्रेष्ठ, सैनिक आवासीय महाविद्यालयका प्रमुख सेनानी सन्तोष कार्की, भक्तपुर नगरपालिका १ का वडाध्यक्ष श्यामकृष्ण खत्री, प्रमुख प्रशासकीय अधिकृत रामलाल श्रेष्ठ, सम्पदा शाखा प्रमुख रामगोविन्द श्रेष्ठ, प्रशासकीय अधिकृत दामोदर सुवाल, उपभोक्ता समितिका पदाधिकारीलगायतको उपस्थिति रहेको थियो । भक्तपुरको रानीपोखरी जीर्णोद्धार कार्य २०७६ जेठ १५ गतेदेखि सुरु भएको र करिब तीन महिनापश्चात् जीर्णोद्धार कार्य सम्पन्न हुने भक्तपुर–१ का वडाध्यक्ष खत्रीले बताए ।