२८ कात्तिक ०७८ ललितपुर । ललितपुर महालक्ष्मी नगरपालिका वडा नं ९ र १०(साविक लामाटार गाविस) मा नेकपा माओवादी केन्द्रमा रहेका १७५ भन्दा बढी नेता तथा कार्यकर्ताहरु एमालेमा प्रवेश गरेका छन् ।
लामाटारमा आइतबार आयोजित पार्टी प्रवेश कार्यक्रममा एमाले नेता तथा पूर्वमन्त्री महेश बस्नेतले ती नेता कार्यकर्तालाई एमालेमा प्रवेश गराएका एमाले ललितपुरका सचिव पुरुषोत्तम आचार्यले जानकारी दिएका छन् ।
विगतमा ठुलो जनधनको क्षति व्यहोरेर जनयुद्ध गरी सत्ताको केन्द्रमा पुगेको माओवादी केन्द्रका नेताहरु पछिल्लो समय सत्ता र स्वार्थमा केन्द्रित हुँदै तल्लो वर्गका जनताको जीवनस्तर उकास्नेतर्फ ध्यान नदिएकोले अब उक्त पार्टीको औचित्यता सकिएको उनीहरुले बताएका छन् ।
दुई दिनअघि मात्र माओवादी केन्द्रको जिल्ला सदस्यको भूमिकामा रहेका रामप्रसाद तिमल्सिना,वाइसियलको नगर इन्चार्ज र विगतको स्थानीय निर्वाचनमा महालक्ष्मी ९ को वडाध्यक्षको उम्मेदवार रहेका मोहनकृष्ण तण्डुकार, वीरमान तामाङ,सुरेश पोखरेल, हरिकृष्ण थापा लगायतका नेताहरुले पत्रकार सम्मेलन आयोजना गरी माओवादी पार्टी परित्याग गरेको घोषणा गरेका थिए ।
आइतबार लामाटारको पूर्व गाविस अध्यक्ष समेत रहेका एमालेका बाग्मती प्रदेश कमिटी सदस्य चिरञ्जीवि आचार्यको समन्वयमा ती नेता कार्यकर्ताहरु एमालेमा प्रवेश गरेका हुन् ।
प्रतिक्रिया