बुद्धनगरको वाग्मतीभित्र पुरिएको फोहर डोजरले निकालिँदै

२४ मंसिर ०७८, काठमाडौँ । काठमाडौँ उपत्यकाको सभ्यताको स्रोत वाग्मतीको बुद्धनगर नदीभित्र गाडिएको फोहरलाई डोजरले निकाल्न थालिएको छ । अधिकारसम्पन्न वाग्मती सभ्यता एकीकृत विकास समितिको अग्रसरतामा यस क्षेत्रको नदीभित्र गाडिएका फोहर निकाल्न थालिएको हो । डोजर लगाएर नदीको तल पुरिएको फोहर निकालेर नदी सफा गर्न लागिएको अधिकार सम्पन्न वाग्मती समितिका सञ्चालक सदस्य डा माला खरेलले जानकारी दिएका छन् ।
सफाइ महाअभियानको ४ सय ४८औँ हप्तामा आज बुद्धनगर क्षेत्रकै नदी किनारमा सफाइ गरिएको छ । सफाइबाट १० मेट्रिक टन फोहर व्यवस्थापन गरिएको पनि उनले बताए । फोहर काठमाडौँ महानगरपालिकाको गाडीले लगेको छ । महानगरपालिकाको गाडीमा फोहर राखेका आधारमा परिणाम सार्वजनिक गर्ने गरिएको सफाइ महाअभियानले जनाएको छ । सफाइमा पूर्व मुख्यसचिव लीलामणि पौडेल, अधिकार सम्पन्न वाग्मती समितिका अध्यक्ष उद्धवप्रसाद तिमल्सिनालगायत ३ सय जनाभन्दा बढी अभियानकर्मीको सक्रियता थियो ।
महाअभियानको ४ सय ५० हप्ता पूरा भएका अवसरमा पुस १० र १७ गते शनिबारको सफाइ अभियानलाई विशेष रूपमा सञ्चालन गरिने भएको छ । यसका लागि तयारी शुरु गरिएको छ । चार ५० हप्ताको विशेष कार्यक्रम पनि बुद्धनगर क्षेत्रकै नदी किनारमा गरिने भएकाले हाल सफाइ अभियानलाई यहाँ केन्द्रित गरिएको हो ।
विसं २०७० जेठ ५ गतेदेखि वाग्मती सफाइ महाअभियान सुरु भएको हो । महाअभियान सुरु भएदेखि प्रत्येक हप्ताको शनिबार बिहान दुई घण्टा सफाइ हुँदै आएको छ । सुरु भएदेखि प्रतिकूल अवस्थामा पनि महाअभियान रोकिएको छैन । महाअभियानबाट प्रभावित भएर उपत्यकामा यसका सहायक नदीका साथै चक्रपथका विभिन्न खण्ड एवं सांस्कृतिक सम्पदास्थलमा पनि सफाइ अभियान भइरहेको छ । हाल काठमाडौँ उपत्यकामा २५ स्थानमा सफाइ भइरहेको छ ।
गुह्येश्वरीमाथिको वाग्मती सफाइ अभियानका क्रममा गोठाटार पुल क्षेत्रमा सफाइ गरिएको छ । मुहानदेखिकै नदी सफाइ गर्ने नाराका साथ भइरहेको यस क्षेत्रको सफाइको नेतृत्व वाग्मती सुन्दरता सरोकार मञ्चले गर्दै आएको छ । यस क्षेत्रमा फोहरको वर्गीकरण गरेर कुहिने फोहरलाई जमिनमुनि गाडिन्छ । नकुहिने फोहरलाई भने त्यस क्षेत्रका नगरपालिकाले व्यवस्थापन गर्दै आएको मञ्चका अध्यक्ष उत्तम पुडासैनीले जानकारी दिएका छन् ।

मनोहरा सफाइ अभियानको २४७औँ हप्तामा काठमाडौँ महानगरपालिका वडा नं ३२ स्थित पेप्सीकोला सिनामङ्गल क्षेत्रमा सफाइ गरिएको छ । सत्तरी अभियानकर्मीको सक्रियतामा भएको सफाइबाट एक गाडी फोहर व्यवस्थापन गरिएको संयोजक चन्द्र दङ्गालले जानकारी दिए ।
यसैगरी आज काठमाडौँ उपत्यकाका रुद्रमती, विष्णुमतीको तल्लो र माथिल्लो भाग, चक्रपथका उत्तरी र पश्चिम खण्ड, ललितपुरको गोदावरी खोलालगायत स्थानमा पनि सफाइ गरिएको छ । महाअभियानबाट प्रभावित भएर काठमाडौँ उपत्यका बाहिर पनि सफाइ अभियान चलिरहेको छ । काठमाडौँ उपत्यका बाहिरका मुख्य सहर, नदी र सांस्कृतिक सम्पदास्थलमा सफाइ भइरहेको छ । उपत्यका बाहिर १ सय ९ भन्दा बढी स्थानमा सफाइ भइरहेको जनाइएको छ ।