भक्तपुरको कमलविनायकमा बिजुक्छेँद्वारा पुस्तक प्रर्दशनीको शुभारम्भ

२१ चैत्र ०७८, भक्तपुर । भक्तपुरको कमलविनायकस्थित लामगालमा तीनदिने पुस्तक प्रदर्शनी आजदेखि सुरु भएको छ । आरम्भ नेपालले आयोजना गरेको पुस्तक प्रदर्शनीको नेपाल मजदुर किसान पार्टीका अध्यक्ष नारायणमान बिजुक्छेँ (रोहित) ले उद्घाटन गरेका छन् ।
कार्यक्रममा उनले भक्तपुरका कवि एवं कार्टुनिष्ट दामोदर सुवालको ‘सय कार्टुन’ नामक कार्टुन सङ्ग्रहको विमोचन गरे । प्रदर्शनीमा अध्यक्ष बिजुक्छेंँले पछिल्ला दिनहरुमा पुस्तक अध्ययनमा ह्रास आइरहेको भन्दै यस खालको पुस्तक प्रदर्शनीले नयाँ पुस्तालाई पुस्तक अध्ययन गर्न अभिप्रेरित गर्ने बताए । उनले पठन संस्कृतिको विकास गर्नुपर्नेमा जोड दिँदै पुस्तकसम्बन्धी छलफल, अन्तरक्रिया र समीक्षात्मक कार्यक्रमलाई बढावा दिनुपर्ने औँल्याए ।
कार्यक्रममा बागमती प्रदेशसभा सदस्य सुरेन्द्रराज गोसाइँले देश र जनताको प्राथमिकता भ्यू टावर नभई शिक्षा र स्वास्थ्य हुनुपर्नेमा जोड दिँदै पुस्तक प्रदर्शनीले मानिसमा ज्ञानको भण्डारको विकास गर्ने बताए ।
त्यस अवसरमा वरिष्ठ कार्टुनिष्ट अविन श्रेष्ठ र कार्टुनिष्ट दामोदर सुवालले कार्टुनिष्टहरु सधैँ प्रतिपक्षी हुने बताउँदै नेपाली राजनीतिका विभिन्न विषयलाई कार्टुनमार्फत सचेत गर्न आवश्यक रहेको औँल्याए । आरम्भ नेपालका अध्यक्ष बालकृष्ण बनमालाले आगामी २३ गतेसम्म पुस्तक प्रर्दशनी हुने बताए ।