नुवाकोटमा गोरु जुधाउदै,विजेता गोरु धनीलाई ५० हजार रुपैयाँ पुरस्कार

नुवाकोट
१ माघ । आज माघे संक्रान्तिको अवसरमा नुवाकोटको तारुका, पन्चकन्या र वेत्रावति लगायतविभिन्न स्थानहरूमा गोरु जुधाउने मेला लाग्दैछ ।
तारुकामा २८, पन्चकन्यामा ११ र वेत्रावतिमा नौ हल गोरु जुधाउने मेला लाग्ने आयोजकहरुले बताएका छन् । यी मध्ये पन्चकन्या ३ पिपलडांडामा विजेता गोरु धनीलाई नगद ५० हजार रुपैयाँ पुरस्कार दिइने आयोजकले बताएका छन् ।
आयोजकले गोरु जुधाउने क्रममा घाइते भएका गोरुहरुको उपचारको व्यवस्था समेत गरेका छन् । यी गोरुहरुको विमा समेत रहेको बताइएको छ । मेला हेर्न काठमाडौं लगायत विभिन्न स्थानबाट आन्तरिक पर्यटक नुवाकोट पुग्छन् । आन्तरिक पर्यटकलाई बस्न र खान होमस्टेको व्यवस्था आयोजकहरुले गरेका छन् ।
गोरु जुधाई कार्यक्रममा किसानहरुले सक्रिय सहभागिता रहेको छ । यहाँ धेरै गोरु जुधाउन दर्ता गरेकाले आज र भोलि दुई दिन कार्यिक्रम राखिएको छ । गोरु जुधाईसँगै राष्ट्रिय कलाकारहरु ल्याई सास्कृतिक कार्यक्रम समेत देखाइनेछ ।
स्पेनको बुल फाइटको झल्को दिने नुवाकोटको मौलिक गोरु जुधाईलाई स्थानीयहरुले प्रतियोगितको रुपमा सम्पन्न गर्दै दर्शकलाई मनोरञ्जन दिने गरेका छन् ।
पछिल्लो समय पशुअधिकारको हनन भएको भन्दै अधिकारवादीहरु यो कार्यक्रमको विरोध गर्दै आएका छन् । तर आयोजकहरु भने विदेशी पर्यटकहरुलाई आर्कर्शित गरेर माघे संक्रान्तिमा समेत पर्यटन भित्राउन सकिने सम्भावना रहेको यो मौलिक संस्कृतीलाई आइएनजिओहरुले विदेशी डलर डकारेको आरोप लगाउने गरेका छन् ।