ललितपुरमा ‘मामाघर’ र भक्तपुरमा ‘छोरीको घर’ निर्माण शुभारम्भ

चापागाँउ

शनिबार ललितपुरको गोदावरीमा मामाघर अनाथ आश्रम भवन निर्माणको शुभारम्भ गरिएको छ ।
गोदावरी नगरपालिका ३ तानसिनटारमा आश्रम सञ्चालक विजय कृष्णमूर्ति श्री महाराजले शिलान्याश गरेका हुन् ।
सो स्थानमा रहेको ४ रोपनी जग्गामा भवन निर्माण हुने सञ्चालक महाराजले कार्यक्रममा जानकारी दिएका छन् ।
भवन निर्माणका लागि पर्खाल लगाउने काम करिव एक महिनादेखि शुभारम्भ गरिएको थियो ।

भवन निर्माणका लागि ललितपुरको गोदावरी, भक्तपुरको ताथली र पशुपति कोटिहोम महायज्ञ आयोजना गरेर आर्थिक सहयोग संकलन गरिएको थियो ।
‘भवन निर्माणपछि भगवान मात्रै आफ्नो भएका अनाथ वालवालिका र वावुआमाको सेवा गर्ने अवसर पाउनेछु । यो सबै पुरा गर्न अग्रसर भइरहँदा आफूलाई भाग्यमानी सम्झेको छु ।’ महाराजले शिलान्याश पछि भनाई राखे ।

आजै भक्तपुर ताथलीस्थित चाँगुनारायण ९मा छोरीको घर ज्येष्ठ नागरिक आश्रमको भवनपनि शिलान्याश गरिएको छ ।