२९ फागुन ०७८, ललितपुर । दुर्घटनामा परी ललितपुर–१० कुपण्डोल निवासी वडा सदस्य ६० वर्षीय वासुदेव थापाको निधन भएको छ । नवलपरासी (बर्दघाट–सुस्तापूर्व) को गैंडाकोटमा भएको सवारी साधन दुर्घटनामा उनको निधन भएको हो ।
गैंडाकोटको थुम्सीमा बस र कार एकापसमा ठोक्किँदा बसमा सवार उनी अचानक बेहोस भई निधन भएको प्रहरीले जनाएको छ। पूर्वबाट पश्चिम जाँदै गरेको ना ६ ख ९४५९ नंको बसले पश्चिमबाट पूर्वतर्फ जाँदै गरेको प्र३–०१–०२२च ५८०७ नंको कारलाई आज बिहान थुम्सीमा ठक्कर दिएको थियो।
सो दुर्घटनाका कारण बसमा सवार थापा अचानक बेहोस भएको र उनको उपचारका क्रममा चितवनको भरतपुरस्थित सरकारी अस्पतालमा निधन भएको जिल्ला प्रहरी कार्यालय नवलपरासी (बर्दघाट–सुस्तापूर्व)का प्रवक्ता प्रहरी नायब उपरीक्षक दिलीपकुमार गिरीले जानकारी दिएका छन् । थापा ललितपुर–१० को निर्वाचित वडा सदस्य हुन्। दुर्घटनामा अन्य मानवीय क्षति भने नभएको प्रहरीले जनाएको छ।
प्रतिक्रिया