ललितपुरको नख्खुमा दशैंको मौका छोपेर लंगुर बुर्जा खेल्नेहरु पक्राउ

१५ असोज ०७९, ललितपुर । प्रहरीले दशैंको मौका छोपेर लंगुर बुर्जा खेल्ने युवाहरु पक्राउ गरेको छ ।
ललितपुर प्रहरीका अनुसार ललितपुरको ललितपुर महानगरपालिका १३ नख्खुखोला नजिक अवैध रुपमा लङगुर बुर्जा खेलिरहेको अवस्थामा ९ जनालाई पक्राउ गरेको हो ।
हुम्ला खार्पुनाथ गाउँपालिका १ घर भई ललितपुर महानगरपालिका १३ कुसुन्ती बस्ने २५ वर्षीय प्रेम बुढा सहित ९ जनालाई बिहीबार साँझ् प्रहरीले पक्राउ गरेको प्रहरीले जानकारी दिएको छ ।
उक्त स्थानमा लङगुर बुर्जा खेलिरहेको भन्ने सूचनापछि जिल्ला प्रहरी परिसर ललितपुरबाट खटिएको प्रहरीले उनीहरूलाई नगद १ लाख २४ हजार ६ सय ३० रूपैयाँ र लङगुर बुर्जा खेल्न प्रयोग भएका सामानहरु सहित पक्राउ गरेको हो ।
यसैगरी ललितपुर ललितपुर महानगरपालिका १५ खुमल्टार बस्ने गौरी लामाको घरमा जुवातास खेलिरहेको अवस्थामा सोही ठाउँ बस्ने ४८ वर्षीय भरत बजगाई सहित ५ जनालाई बिहीबार साँझ प्रहरीले पक्राउ गरेको छ ।
उनको घरमा जुवातास खेलिरहेको भन्ने खबर प्राप्त हुनासाथ जिल्ला प्रहरी परिसर ललितपुरबाट खटिएको प्रहरीले उनीहरुलाई नगद ५ लाख ३५ हजार रूपैयाँ र ३ बुक तास सहित पक्राउ गरेको हो ।
घटनाहरुका सम्बन्धमा प्रहरीले आवश्यक अनुसन्धान गरिरहेको जानकारी दिएको छ ।