बास्कोटाको घरमा भेटिएको शंकास्पद वस्तु सेनाद्वारा निष्क्रिय

१८ मंसिर ०७९, काठमाडौं ।  नेकपा (एमाले)का नेता गोकुल बास्कोटाको घरमा राखिएको शंकास्पद वस्तुलाई नेपाली सेनाले निष्क्रिय पारेको छ । आइतबार बिहान बास्कोटाको घर परिसरमा देखिएको शंकास्पद वस्तु बम भएको आशंकामा प्रहरीले नेपाली सेनाको बम डिस्पोजल टोलीलाई बोलाएको थियो ।

सेनाले उक्त वस्तुलाई निष्क्रिय पारेको भक्तपुर प्रहरीले जनाएको छ । तर उक्त वस्तु के थियो भन्नेबारे सेनाको ल्याब परीक्षणपछि मात्र थाहा हुने प्रहरीले जानकारी दिएको छ । यसअघि ०७६ को फागुन २८ मा बास्कोटाको घरमा बम विष्फोट भएको थियो । त्यतिबेला बनिरहेको घरमा भएको बम विष्फोटबाट झ्यालका सिसा फुटेका थिए । बम विष्फोटमा संलग्न रहेको आरोपमा प्रहरीले नेत्रविक्रम चन्द ‘विप्लव’ निकट तीन जनालाई पक्राउ गरेको थियो ।