कुलेखानी भरिएपछि आश्राङ्ग प्युटारमा चिन्ता

लपु संवाददाता
३० असार ०७६, काठमाडौं । अविरल वर्षाका कारण मकवानपुरस्थित कुलेखानी जलविद्युत आयोजनाको सरोवर भरिएको छ । ईन्द्र सरोवरमा पानी अत्यधिक भएपछि बाँध खोलेर बाहिर निकालिँदै छ । ड्याम खोलेर पानी पठाउदा स्थानीय बस्तीमा पानी पस्ने त्रासले केही दिन अघि बाढीले त्रसित दक्षिण ललितपुरका आश्राङ्ग प्युटार माल्टा गिम्दीका स्थानीय चिन्तित छन् ।
कुलेखानीको क्षमताभन्दा बढी पानी भरिएर जोखिम भएकाले जिल्ला सुरक्षा समिति मकवानपुरको बैठकले ड्याम खोलेर पानी निकाल्ने निर्णय गरेको प्रमुख जिल्ला अधिकारी अस्मान तामाङले जानकारी दिए । कुलेखानीको पानी कुलेखानी खोला हँुदै वाग्मती खोला भएर बग्छ ।