ललितपुर च्यासलमा दिउँसै लुटपाटकाे आरोपमा चार जना पक्राउ

२४ पुस ०७७, च्यासल । ललितपुरको च्यासलमा दिउँसै लुटपाट भएको छ । लुटपाटको आरोपमा प्रहरीले तीन महिलासहित चार जनालाई नियन्त्रणमा लिएको छ ।
महानगरीय अपराध महाशाखाको टोलीले बिहीबार साँझ साढे ५ बजे चार जनालाई पक्राउ गरेको हो। पक्राउ पर्नेमा उदयपुरका २६ वर्षीय भरत मगर, ताप्लेजुङकी २८ वर्षीया निर्मला राई, ३० वर्षीया सुस्मिता डिम्डो र २९ वर्षीया लबिन तामाङ रहेका छन्।

उनीहरूले १३ गते दिउँसो साढे दुई बजेतिर नुवाकोट घर भई च्यासल बस्ने ५७ वर्षीया धनकुमारी ठकुरीको कोठामा लुटपाट गरेको आरोप छ ।
उनीहरूले ठकुरीको कोठामा गई लोभलालच देखाइ दुई वटा सी माला, एउटा पहेँलो पत्थर, एउटा पहेँलो टल्किने धातु र १४ वटा पूराना सिक्का लुटेर लगेका थिए। लुटपाट गरेको उजुरी परेपछि प्रहरीले खोजी शुरू गरेको थियो। पक्राउ परेकाका थप अनुसन्धान भइरहेको प्रहरीले जनाएको छ।