पाटन अस्पतालको अक्सिजन प्लान्ट मर्मतको माग गर्दै युवा संघ ललितपुरको ध्यानाकर्षण

ललितपुर खबर
४ जेठ ०७८, ललितपुर । राष्ट्रिय युवा संघ ललितपुरले पाटन अस्पताल प्रशासनमा विग्रेको अक्सिजन प्लाण्ट मर्मत गरी सुचारु गर्न माग गर्दै ज्ञापन पत्र बुझाएको छ । राष्ट्रिय युवा संघ ललितपुरका संयोजक चिन लामाको नेतृत्वमा पाटन अस्पताल पुगेको टोलीले अस्पतालका निर्देशक डा. रवि शाक्यलाई ज्ञापन पत्र बुझाएको ललितपुर खबरलाई जानकारी दिए ।
केही बर्षदेखि विग्रेर अलपत्र अवस्थामा रहेको प्लाण्ट अक्सिजन अभावमा अस्पतालमा कोरोना संक्रमितको मृत्यु भएपछि मर्मत गरी सञ्चालन गर्न माग गर्दै ज्ञापन पत्र बुझाएको लामाले बताएका छन् ।
केही समय अघि ललितपुर महानगरले बजेट विनियोजन गरेको भए पनि यो अक्सिजन प्लाण्ट मर्मत भएको थिएन ।

पाटन अस्पतालमा ३ सय बेड क्षमता भए पनि अक्सिजनको अभावमा २ सय विरामी मात्रै भर्ना गर्न सक्ने अवस्थामा रहेकोले अस्पतालले अक्सिजन प्लाण्ट नयाँ नै स्थापना गर्ने योजना बनाएको निर्देशक शाक्यले ज्ञापन पत्र बुझ्दै बताएका थिए । उनले भने, ‘पुरानो बनाउदा १ सय बेडलाई मात्रै अक्सिजन पुग्छ । तर अहिले ३ सय बेट नै चालु गर्नु पर्ने अवस्था छ ।’
सरकारले सबै अस्पताललाई अस्सिजनको व्यवस्थ गर्न बजेट विनियोजन गरेको सन्र्दभ उल्येख गर्दै शाक्यले भने, छिट्टै हवाई जहाजबाट प्लान्टको लागि सरसामान ल्याएर भए पनि ३ सय बेडलाई पुग्ने प्लान्ट सञ्चालन गरेर अक्सिजनको व्यवस्था गर्छौं ।
शाक्यले ३० प्रतिशतसम्म विग्रेको अवस्थामा पुरानो अक्सिजन प्लाण्ट मर्मत गर्न उचित हुने बताउदै भने, ५० प्रतिशत भन्दा धेरै विग्रेको छ । नयाँ स्थापना गर्दा राम्रो हुन्छ ।
ललितपुरको एक मात्र भरपर्दो अस्पतालको रुपमा रहेको पाटन अस्पतालमा अक्सिजन नहुँदा विरामीलाई समस्या परेको जनगुनासो आएपछि आफूहरुले अक्सिजन प्लाण्ट मर्मतको माग लिएर अस्पताल पुगेको संयोजक लामाले बताए । उनले भने, ‘आवश्यक परेको खण्डमा हामी अस्पताललाई ’्स्वयम्सेवी उपलव्ध गराउन तयार छौं ।’