सुभानु आचार्य
११ कात्तिक ०७८, ललितपुर । स्पेनको स्वायत्त प्रान्त एक्टेमदुराका सभामुख तथा सोसलिस्ट पार्टी अध्यक्ष ब्लान्का मार्टिन डेलगाडोसहितको टोलीले आज विहीबार विश्वसम्पदा सूचीमा सूचीकृत ललितपुर महानगरपालिका १६ स्थित ऐतिहासिक पाटन दरबार क्षेत्रको अवलोकन गरेको छ ।
पाटनको धार्मिक तथा सांस्कृतिक पहिचानलाई थप अघि बढाउन र यसबारे जानकारी हासिल गर्न भ्रमण गरिएको हो । भ्रमण टोलीले पाटन दरबार सङ्ग्रहालयका तीनै चोकका साथै दरबार परिसरमा रहेका जगत्नारायण, हरिशङ्कर र कृष्णमन्दिरका बारेमा जानकारी लिएको थियो ।
सभामुख तथा अध्यक्ष डेलगाडोले पाटन दरबार क्षेत्र गुगलमा देखिएभन्दा निकै राम्रो भएकाले यसको जगेर्ना गर्न उपस्थित महानुभावलाई आग्रह गरिन् । वाग्मती प्रदेश सरकारका सभामुख सानु श्रेष्ठले अवलोकनपछि यस टोलीले स्पेन फर्किएर बुद्ध उद्यान निर्माण गर्ने बताइन् । उनले भनिन्, “यस भ्रमण मुलुकका लागि निकै फलदायी र उपलब्धिमूलक हुने विश्वास लिएको छु ।”
यसैगरी लपु महानगरपालिकाका प्रमुख चिरीबाबु महर्जनले यस भ्रमणबाट ललितपुरको पहिचान थप अघि बढ्न सहयोग पुगेको विश्वास व्यक्त गरे । टोलीले पाटन दरबार क्षेत्रको हिरण्यवर्ण महाविहारका साथै कृष्णमन्दिर अगाडि दुई पाटीको बारेमा समेत जानकारी लिएको थियो ।
रासस
प्रतिक्रिया