बौद्धमा अनलाइन जुवा खेलाइरहेका ८ महिलासहित ७४ जना पक्राउ

१७ माघ ०७८, काठमाडौं । बौद्धको एक रेष्टुरेन्टमा अनलाइन जुवा खेलाइरहेको अवस्थामा ७४ जनालाई पक्राउ गरेको छ। महानगरीय प्रहरी परिसर काठमाडौं र महानगरीय प्रहरी बृत्त बौद्धको टोलीले ८ महिलासहित ७४ जनालाई नियन्त्रणमा लिएको हो।

काठमाडौं महानगरपालिका वडा नम्बर ६ बौद्धस्थित दोलखा घर भएका ३० वर्षीय सुभाष घिसिङकाे रेष्टुरेन्टमा प्रहरीले छापामार्ने क्रममा नगदसहित उनीहरुलाई नियन्त्रणमा लिइएको एसपी दिनेश मैनालीले जानकारी दिए ।

उनीहरुको साथबाट बिङ्गो खेल्न प्रयोग गरिने कुपन, उक्त खेलमा प्रयोग गरिने सामाग्री र ६ लाख १९ हजार रुपैयाँ नगदसमेत बरामद गरिएको प्रहरीले जानकारी दिएको छ ।