भक्तपुरमा डलर देखाएर ठगी, चोर भन्दै गाउँले कुटे, उपचारका क्रममा निधन

१३ चैत्र ०७८, भक्तपुर । भक्तपुरमा डलर देखाएर ठगी गर्ने एक युवकको कुटेर हत्या भएको छ । घटना होलीको अघिल्लो दिनको हो । भक्तपुर चाँगुनारायणमा ‘सस्तो मूल्यमा डलर साटिदिन्छौँ’ भनेर एकजना युवाले दुई जनालाई बोलाएका थिए ।

सोही लोभमा परि मकवानपुरका सुरेश न्यौपाने र कैलालीको गोदावरी नगरपालिका–२ घर भएका वीरेन्द्र बहादुर खड्का चाँगुनाराणस्थित हलखोरियामा गएका थिए ।

थोरै मूल्यमा धेरै डलर लिने भनेर उनीहरु ८ लाख रुपैयाँ लिएर गएका थिए । सिन्धुपाल्चोकको बाह्रबिसे नगरपालिका–४ घर भएका रेशम बुढाथोकीले रुमालमा पोको बनाएको डलर उनीहरुलाई दिए । ८ लाख लिएर फटाफट हिँडिहाले । रेशमले दिएको पोको फुकाएर हेर्दा त्यहाँ डलर थिएन कि डलर आकारमा काटेर बाँधेको कागज थियो ।

चोर–चोर भन्दै उनीहरुले रेशमलाई लखेट्न थाले । गाउँलेहरुले ‘चोर’ आएको भन्ने ठाने । त्यसपछि सुरेश र वीरेन्द्र मिलेर उनलाई कुटे । निर्घात कुटेपछि गाउँलेले प्रहरीलाई खबर गरे । महानगरीय प्रहरी प्रभाग साँखुबाट खटिएको टोलीले कुटेर गम्भीर घाइते भएका रेशमलाई अस्पताल पठाए । कुटपिटमा संलग्न दुई जनालाई प्रहरीले नियन्त्रणमा लियो ।

कुटपिटबाट गम्भीर घाइते भएका रेमश बुढाथोकीको त्रिवि शिक्षण अस्पतालमा मृत्यु भएको थियो ।

सुरेश न्यौपाने र विरेन्द्र बहादुर खड्कालाई ज्यान सम्बन्धी कसुरमा म्याद लिएर अनुसन्धान भइरहेको महानगरीय प्रहरी परिसर भक्तपुरले जनाएको छ ।