ललितपुरको झरुवाराशीमा आयुर्वेद अस्पताल निर्माण हुने

ललितपुर खबर
१० असोज ०७९, ललितपुर । ललितपुरको झरुवाराशीमा जिल्ला आयुर्वेद स्वास्थ्य केन्द्रले आयुर्वेद अस्पताल निर्माण गर्ने भएको छ ।
भवनको अभावमा हाल ललितपुर सातदोवाटोनजिकै ताल्छिखेलमा कार्यालय तथा आयुर्वेद अस्पताल सञ्चालन रहेकोमा गोदावरी नगरपालिकाले जग्गा सिफारिस गरेसँगै अस्पताल र जिल्ला आयुर्वेद केन्द्रको प्रशासनिक भवन निर्माण प्रकृया सुरु भएको हो ।
जिल्ला आयुर्वेद केन्द्रकी प्रमुख डाक्टर श्रृष्टि श्रेष्ठले नगरपालिकाले सिफारिस गरेसँगै मालपोत कार्यालय ललितपुरमा कागजात पेस गरिएको बताइन् । उनका अनुसार मालपोतको काम सकिरुपछि जिल्ला प्रशासन कार्यालयमार्फत मन्त्री परिषदबाट निर्णय गराई भवन जिल्ला आयुर्वेद केन्द्रको स्वामित्वमा आउनेछ ।

९ रोपनी ५ आना क्षेत्रफल रहेको जग्गा गोदावरी नगरपालिका १३को वडा कार्यालय नजिकै रहेको छ ।
भवन निर्माणका लागि प्रदेश सरकारबाट बजेट समेत विनियोजन भइसकेको छ । उनले भनिन्, ‘बहुबषिय योजनाका लागि ४ करोड बजेट छुट्याइएको छ ।’
२०५६ सालमा स्थापना भएको जिल्ला आयुर्वेद केन्द्रसँग्र ललितपुरको ५१ ठाँउमा आर्युर्वेद औषधालय सञ्चालनमा छन् ।
पछिल्लो समय आयुर्वेद उपचार पद्धतीमा सर्वसाधारणहरुको आर्कषण बढेको छ । कोरोना संक्रमणका बेला आयुर्वेद औषधिको प्रयोगले रोगसँग लड्ने क्षमता बढाउन धेरै नेपालीले आर्यर्वेद औषधिको प्रयोग गरेका थिए ।
डाक्टर श्रेष्ठले आयुर्वेद औषधिसँगै उपचार र रोगको पत्ता लगाउन आधुनिक जाँच प्रणाली नै अवलम्बन गरिने बताइन् । उनले भनिन्,‘जनमानसमा आयुर्वेद उपचार प्रणा ली भन्नासाथ पुरातन औषधोपचार प्रणाली भन्ने सम्झने गरेको पाइएको छ । हामी आधुनिक प्रणालीलाई समेत अंगालेर उपचार गछौं । यो उपचार बैज्ञानिक छ ।’