‘४४ वर्ष ललितपुरकै भू भागमा बिताएको छु’

१२ कात्तिक ०७९, ललितपुर । ललितपुर ३ बाट प्रतिनिधि सभामा उम्मेदवारी दिएकी नेतृ पम्फा भुसालले आफू ४४ वर्ष ललितपुरको भू भागमा बिताएको बताएकी छिन् । उनले भ, “राजनीतिक परिवर्तनका साथै राष्ट्र र जनताको निम्ति आफ्नो जीवन यही समर्पित गरेको छु ।”
ललितपुरको भुभागभन्दा बाहिरबाट आएर उम्मेदवारी दिएको टुरिष्ट उम्मेदवार भन्दै आलोचना भइरहेको सन्दर्भमा पछिल्लो समय उनको ललितपुरमा आलोचना भइरहेको छ ।
प्रतिनिधिसभा सदस्यका लागि मतदाता सूचीमा नाम भएका व्यक्तिले जुनसकै क्षेत्रबाट पनि उम्मेदवार दिन सक्ने संवैधानिक व्यवस्था रहेको उल्लेख गर्दै संवैधानिक दायराभन्दा बाहिर गएर अभिव्यक्ति दिने स्वतन्त्रता कसैलाई पनि नभएको बताइन् ।

आफू कुनै विरासतका आधारमा राजनीतिमा नआएको उल्लेख गर्दै उनले लैङ्गिकरूपमा महिला भए पनि कहिल्यै त्यसरूपमा प्रस्तुत नगरेको बताइन् ।
ऊर्जा, जलस्रोत तथा सिँचाइमन्त्री समेत रहेकी पम्फा भुसालले आफू प्रतिनिधिसभा सदस्य भएदेखि नै देश र जनताको पक्षमा भूमिका निर्वाह गर्दै आइरहेको बताइन् । आज ललितपुरमा आयोजित वाम–लोकतान्त्रिक गठबन्धनको कार्यकर्ता प्रशिक्षण कार्यक्रममा उनले आफूले पाएको जिम्मेवारीलाई इमान्दारितापूर्वक पूरा गर्दै आएको दावी गरिन् ।
“प्रतिनिधिसभा नीति, नियम र कार्यक्रम बनाउने थलो हो, प्रतिनिधिसभामा रहेर मैले आफ्नो राष्ट्रिय भूमिका निर्वाह गरेको छु”, प्रतिनिधिसभा निर्वाचन क्षेत्र नं ३ का उम्मेदवार भुसालले भनिन्, “मुलुकमा राजनीतिक स्थायित्व ल्याउन र आर्थिक, सामाजिक विकासका एजेण्डालाई पूरा गर्न सधैँभर लागिपर्छु ।”