नौ दिनमा ललितपुरमा थप ३९ जनामा डेंगु

२४ कात्तिक ०७९, ललितपुर। पछिल्ला ९ दिनमा ललितपुरमा ३९ जनामा डेंगु संक्रमण पुष्टि भएको छ । काठमाडौंमा २ सय २१, भक्तपुरमा ४२ र ललितपुरमा ३९ गरी उपत्यकामा ३ सय २ जनामा संक्रमण देखिएको हो । सोही अवधिमा मुलुकभर ६७ जिल्लामा १ हजार १ सय ६६ जनामा डेंगीको संक्रमण देखिएको स्वास्थ्य सेवा विभाग, इपिडिमियोलोजी तथा रोग नियन्त्रण महाशाखा (ईडीसीडी) ले जनाएको छ । डेंगीबाट १० जिल्ला बढी प्रभावित छन् । यी जिल्लामा मात्रै ८४ प्रतिशत संक्रमित छन् । काठमाडौंमा १३ हजार ७ सय ८७, ललितपुरमा ९ हजार ५ सय २२, भक्तपुरमा ५ हजार ४ सय ८९, मकवानपुरमा ५ हजार ३ सय ४७, चितवनमा २ हजार ६ सय २७, दाङमा २ हजार ३ सय ८८, धादिङमा १ हजार ४ सय ११, रूपन्देहीमा १ हजार १ सय ९५, काभ्रेपलाञ्चोकमा ५ सय ३६ र सुर्खेतमा ४ सय ७७ जनामा संक्रमण देखिएको छ ।

शुक्रराज ट्रपिकल तथा सरुवा रोग अस्पताल टेकुको आईसीयूमा ३ जना डेंगी संक्रमित भर्ना छन् । त्यहाँ दिनहुँ पुग्ने ज्वरोका ५० बिरामीमध्ये बहुसंख्यक डेंगीबाट संक्रमित छन् ।